A cheografía como perbersión d’a importanzia d’as notizias

miércoles, enero 20, 2010 21:28
Publicado en la categoría purnas

A cheografía ye un d’os criterios alazetals a l’inte de clasificar as notizias. De feito, bi ha asabelos (por no dizir toz) meyos que encara fan a distribuzión d’espazioo durazión por a cheografía. Ye un critero lochico tanimientres ye normal que a toz os umans mos alticaman más as cosas d’amán que no pas as de luen, y, por atra man, tamién bi ha chen que ye intresada más en o que pasa en o mundo y no pas en o que pasa en casa suya. Ye una manera d’ordenar y fer “canals” singulars de notizias ta presonas concretas.

Pero ixe criterio cheografico, de begadas, perbierte y malmete o sentiu zaguero d’as notizias, d’o periodismo. Istos diyas tenemos o caso d’o tierratremo de Haití. Ye un d’ixos desastres naturals que esdebienen notizia global por a grandaria d’as zifras, d’o desastre, d’a situgazión terrible en que quedan milentas de presonas que ya yeran en una situgazión que no yera guaire buena. Sin dembargo, no toz os meyos  han tratau d’a mesma manera o desastre. Uns, porque nomás han ficau os güellos en l’aduya d’o suyo país enta Haití. Atros, porque nomás se fixan en as declarazions politicas. Atros, más, porque se zentran en as cosas aneudoticas (twitter cayiu, collas en facebook, chen que se salba porque o suyo abión sale chusto cuan a tierra tremola…).

En o caso d’os meyos aragoneses a perbersión biene directamén por a cheografía. O forau que separa as notizias d’Aragón, con as d’a resta d’o mundo ye tan gran en os meyos aragoneses, que nomás cuan s’ha sabiu que eba muerto una muller polizía aragonesa (os mios condols ta la suya familia) han ubierto os informatibos de telebisión con o tierratremo, u han adedicau más d’una pachina a la catastrofe. De feito, a casa an triballo, nomás ha logau un freelance ta fer direutos dende Haití cuan se confirmó que Rosa Crespo eba moriu. Chusto dimpués d’una semana d’o piyor tierratremo en 200 años y con a zifra d’os 100.000 muertos dondiando por as cabezas de toz y as carreras de Port-au-Prince.

O diya d’o tierratremo no ubriemos l’informatibo, sisquiá en garra d’os diyas siguiéns, fueras d’ayer. Tampoco no os grans diarios aragoneses han alterau a suya composizión ta prenzipiar con a notizia de l’año. Yera más important charrar de proyeutos d’Olimpiadas, l’alerta por aire o a ziudat d’a Chustizia de Zaragoza. Ixo perbierte un d’os exes d’os criterios informatibos, porque si ye important a proximidat ta charra d’una o d’atra cosa, bi ha cosas que traspasan ixa muga ta esdebenir feitos globals.

Por desdramatizar, un exemplo más amán d’ixa perbersión. Cuan o zaguer “temporal de frío” que li dizen agora a l’ibierno, en os meyos aragoneses se beyiba en una pachina (u en un menuto de l’informatibo) l’A-2  por O Frasno y en atra pachina (luén d’a primera) u en atro menuto (luén d’o primero) l’A-2 por Medinazeli (Soria). Yeran más luén en os informatibos y periodicos que no pas d’o que son en reyalidat. Ye lebar a cheografía como criterio enta un estremo ridiculo. De feito, soi conbenziu que si ese dezaga d’ixo una intinzión politica, sería tot lo contrario.

Yo no tiengo a soluzión ta isto, pero si que pienso que cal ser una mica flexible con o criterio distanzia y o criterio cheografía. En Internet ye prou más fázil porque as etiquetas que podemos meter en as notizias pueden serbir ta localizar y categorizar por atros criterios, asinas cada presona puede trigar a forma de bier as notizias. U bueno, ye posible fer ixo, atra cosa ye que en aiga meyos que no empleguen ixa posibilidat.

Puedes dejar una respuesta, o un trackback desde tu sitio.

Una respuesta to “A cheografía como perbersión d’a importanzia d’as notizias”

  1. Bitacoras.com says:

    enero 20th, 2010 at 21:28

    Información Bitacoras.com…

    Valora en Bitacoras.com: A cheografía ye un d’os criterios alazetals a l’inte de clasificar as notizias. De feito, bi ha asabelos (por no dizir toz) meyos que encara fan a distribuzión d’espazioo durazión por a cheografía. Ye un critero lochico tanim…..

Dixa un comentario