Yo creigo que no ye incompatible en dengún caso o emplego de diferens lenguas por una mesma persona. A yo me cuaca la polifonía y emplego a mayoría de fablas en as que puedo esprisar-me (aragonés, catalán, castellano, inglés, italiano…) Anque a lengua d’o mío corazón ye l’aragonés y mesmo lo castellano-aragonés. Do muita chen veye problemas, en o multilingüismo, yo veigo una d’as mayors valuras d’o nuestro mundo. Y que Aragón tienga una riqueza lingüistica tan gran solamén caldría que fuese motivo de goyo. Ye o “petrolio” de l’alma d’ista tierra.

En o respeutive a la grafía, yo respeto todas y emplego muitas vegadas a mía, que ye prauticamén similar a la d’o Consello. No cal sacralizar iste tema. Yo tamién puedo emplegar a ortografía de l’Academia u a d’o Consello. ¿Incoderenzia, irresponsabilidá? No quiero cremar a mía ilusión por l’aragonés, por ixo voi una miqueta “por libre”. A grafía definitiva será la que a futura autoridà lingüistica nombrata por o nuestro gubierno dezida, u bien una nueva, una bien caldrá que trigue entre as opzions actuals. Esprisions.

Cuanto a os comentarios d’”Academia?”, dezir que me pareix tamién que a posizion de Chorche ye correcta y coderent. Entre que no tiengamos garra cosa salida d’a lechitimidat d’o 2º congreso de l’Aragonés, cal emplegar as normas salidas d’o primer congreso (nos cuaquen más u menos). Man y menos, malas que l’Academia de l’Aragonés quite a nueba ortografía (resultau d’o treballo de discusión y conberchenzia interno), emos d’emplegar ixa nueba grafía (nos cuaque más u menos).
Cal dezir que no ye que l’Academia no aiga feito cosa en 2 años, y dimpués en bel par de meses han dezidiu de fer una nueba ortografía. Por o que se, d’as presentazions que ha feito l’Academia, ista ortografía ye resultau d’un treballo d’años, de fixar os principios e ir discutindo os criterios.
Isto ye asinas porque l’Academia no yera (ni ye) de garra traza monolitica sino que i hai en dentro diferents sensibilidaz (y más que n’i abría, si toz os que estioron proposaus esen azeptau d’estar-ie). Ye muit fázil d’acordar una nueba ortografía si nos achuntamos bella dezena de personas “d’a mesma cuerda”, pero muito más difízil si se parte d’una eterocheneidat como a de l’Academia. Ye por ixo normal tot iste tiempo (encara que creigo que tardar tanto ha perchudicau asabelo a l’Academia), pero tamién ye una guarenzia de que as normas pueden tener una mayor azeptazión (más que más entre os parladors patrimonials, grazias a la presenzia d’istos en l’Academia y a o treballo de presentazión por os lugars aragonesofonos).

O segundo tema, ye o d’a supuesta inmediatez de l’Academia d’a Luenga Aragonesa. Uno puede pensar que no cal continar treballando, que plegará a nueba Academia… Grieu error, seguntes o mío pareixer… Ixo mesmo se podeba pensar dimpués d’o II Congreso, y l’Academia ha tardau más de 2 años en quitar o suyo primer prochecto ofizial (en febrero seguntes a prensa, saldrá publicada a nueba ortografía). En primeras, caldrá aguardar que se creyen toz os organos (que istas cosas gosan fer-se más tarde d’o que obliga a lei), dimpués cal que siga bella cosa operatiba, ya que o Consello Superior lo proposarán a Unibersidat (1/3), o Gubierno, ye dizir, PSOE-PAR (1/3), y as Cortes, ye dizir PSOE-PP (1/3). Istos son os que han de creyar a nueba academia (u tamién podrían “refundar” l’Academia de l’Aragonés y belatra cosa existent como academia ofizial). Si a cosa ye operatiba, nos trobaremos con una nueba academia con muitas y diferents sensibilidaz, que tiene debán d’ella a fayena de normatibizar l’aragonés. Cuánto puede tardar en pasar isto… yo m’atrebería a dezir que años… Pero tamién puede estar que l’Academia Oficial remate por estar feita de chen que ni sisquiera creye en l’Aragonés. Alabez ya podemos aguardar ta cutio…
Por ixo creigo que l’argumento d’a supuesta calendata de zircunduzión d’istas normas no ye balido, y d’ixo ya en tenemos experienzia.
L’Academia de l’Aragonés ha de continar con os suyos benients prochectos (que ya han presentau publicamén), y creigo que emos d’emparar-la. O treballo creigo que ye bueno, y encara que l’academia ofizial no tenese cosa a beyer con ista, cuento que a rigor d’o treballo feito les abría de lebar a reprener y continar os treballos ya feitos un prenzipiaus por l’Academia de l’Aragonés.

En tot caso, prou que o más imprtant ye charrar y escribir en aragonés (con a ortografía que siga).

Rasmia aragonesa ta recuperar nuestra fabla.

Grazias, compa.