Blogs en aragonés
Lunes, diciembre 7, 2009 11:47
L’atro diya Orlando Suárez me preguntaba por a blogosfera en aragonés. Prenzipié a charrar-li de bels blogs que conoxco y dimpués remeré que fa tiempos ya que creyé un adibidor que creigo que ya no funziona y tamién un planeta en aragonés en Netvibes (que no ye esbiellau). Tamién Charrando tien una lista de blogs en aragonés, pero bi ha muitos que ya no esisten. Nireblog, por atra parte, ye un sistema de chestión de blogs que ufre a posibilidat de chestionar os blogs en aragonés, cosa que s’agradeze, y que fa más fazil o prozeso de creyar un blog en aragonés.
Yo agora emplego de forma cutiana Google Reader ta siguir os blogs y meyos de comunicazión que m’intresan por una u atra custión. Fazié una carpeta nomás que ta blogs en aragonés y agora he dezidiu ubrir-la. Asinas que se puede dentrar fazilment en os blogs en aragonés que yo sigo o que conoxco. Como beyerez, bi ha blogs de cuasi tot, mosica, politica, sexualidat, narrazions, teunolochía… L’aragonés se puede emplegar ta tot, y en os blogs asinas o femos.
Tos dixo de todas trazas a lista completa aquí, que no ye a lista de toz os blogs en aragonés, aspero, asinas que si conoxez más blogs en aragonés podez dixar en os comentarios y podremos adibir-los a la lista y a o leutor feed de blogs en aragonés en o reader.
