Maitín, cabo d’año de l’asesinato de Josefo

domingo, septiembre 12, 2004 15:19
Publicado en la categoría purnas

O 13 de setiembre de 1979 á la meya ta las diez d’a nueit, Chuse Lois Alcazo, aragonesista d’Albero Baxo que residiba en Madrit, pasiaba con os suyos amigos per o parque d’o Retiro en Madrit. Luis Francisco Canicio y Jesús Oyamburu iban debán. Chuse Lois Añcazo (“Josefo”), Marisol, Mariela y Luciano iban una mica més dezaga.

Sin prebio abiso amanixión dentre os arbols bels chobens armaus con bates de béisbol y tochos.
Yeran ninos bien, quinzeañeros de pelo muito curto y ropas correutas. “Per a esquena, inopinademén y per sospresa”, seguntes a sentencia que condenó a Os batiadors, Canicio y Oyamburu estión enrestius y abatanaus, mientres Chuse Lois, que salió en a suya esfensa, remató muerto en a “emboscada”.

En os bates de béisbol eban escrito as leyendas “Viva el Fascio Redentor” y S.E, sieglas que significan Sección Especial (a famosa Sección Z) y que fan referencia á o grupo que funcionaba aintro de Fuerza Joven.
Este ye o nombre d’os asesins, que agora tendrán arredol de 40 años: Eduardo Limaña Sanjuán (o chefe), Gabriel Rodríguez Medina, Fernando Pita da Veiga y Corral (sobrino de l’ecsmenistro que dimitié cuan s’anunzió a legalización d’o PCE), Miguel Fernández Alegre, Emeterio Iglesias Sánchez, José Antonio Nieto García, Angel Luis Nieto García, Jose María Nieto García y Pablo Calderón Fornos (estos nombres amanexen en o libro “Los hijos del 20-N” asinas que creigo que pueden fer-sen publicos aquí perque ya en son fa años)

O mes de nobiembre d’o 2002 estió reconoxido y omenacheau como bitima de o terrorismo en o Senau. A mai y a chirmana i fuon á replegar a condecoración. Per contra l’aragonesismo no sabe guaire a suya esistenzia.

Chuse Lois yera aragonesista y miembro d’o Rolde d’Aragonés d’o Seminario d’Estudios Aragoneses en Madrit. Caldría reflesionar sobre a quí l’intresa amagar á esta bitima y reibindicar-la como bitima aragonesista d’o terrorismo nazionalista español.

Se cumplen, pues, 25 añadas d’este atentau terrorista español ( reconoxiu ofizialmén) contra un choben aragonesista

Chunto par d’atro tos cuaterno as línias de duelo que amanexión en a rebista Fuellas en Otubre de 1979.

“BEIGO QUE T’EN YES IU, CHUSE LOÍS, CUAN O SOL DE MADRI S’AMORTABA POR A CASA DE CAMPO. UNOS NINOS PLENOS DE CARRAÑA TE DIÓN DE TOCHAZOS DICA LA FIN. T’EN FUÉS COMO RA CHEN D’A NUESTRA TIERRA CUAN LA DIXA, SIN DIZIR COSA, SIN TASTAR A TUYA LIZENZIATURA N’ISTORIA.
REMERO CUAN PLEGABAS TA LO ROLDE D’ARAGONÉS QUE EN TENEBANOS EN O COLEXIO MAYOR LOYOLA, CON A TUYA CHIRMANA CARMEN, BOTECARIA, CON OS MESACHES D’ANSÓ, BIELSA, GRAUS, SAMIANIGO….REMERO IXE SABADO QUE MOS CHARRÉS DE CHUAQUÍN COSTA, TALMEN CUAN TORNÁBANOS EN O METRO D’AS CLASES DE FABLA ARAGONESA.
NO BO Á DIZIR COSA DE L’AMOR DE TÚ POR TÓ LO QUE D’ARAGÓN ESTIESE, NI D’AS IDEYAS D’OS QUE T’AMORTORON, DE COSA QUIÓ CHARRAR. TASAMÉN CHITAR ISTAS PAROLAS TA L’AIRE Y DIZIR ¿POR QUÉ? ¿DICA CUAN?
CONDIOS , CHUSE LOIS”

Chesús de Chaime (Balenzia) otubre de 1979.

Puedes dejar una respuesta, o un trackback desde tu sitio.

Dixa un comentario