1 de Mayo. Manifiesto d’o S.O.A.

sábado, mayo 1, 2004 11:35
Publicado en la categoría purnas

1 de mayo de 2004

Diya internazional de a Clase treballadera
Cal continar luitando!!

A bictoria d’o PSOE en as zagueras eslezions estatals d’o 14-M á creyau un clima de confitanza en Aragón que mos pensemos que ye tan desacherau que solo con unos días en o gubierno zentral ha conseguiu esmobilizar a reibindicazión aragonesa contra o Plan Idrolochico.

A retirada d’o proyecto de trasbase no ye que una promesa, y lexos de que os aragoneses nos quedemos en casa nuestra, nos cal salir t’a carrera ta fer alcordanza d’o compromís d’o PSOE. Son estos momentos de duda en os que cal “foter caña” ta que o proyecto que espolia una d’as riquezas d’Aragón siga acotolau de tot y pa cutio.

Muito s’ha aprezisau o siñor Iglesias en esmobilizar á o pueblo aragonés en una estratechia que remera la feita por o suyo partiu en 1994 cuan o guerrista y antiaragonesista José Marco desactibó y traizionó tot o mobimiento por o masimo ran d’autogobierno que se dio en Aragón en l’empieze d’os nobanta. No podemos “dormir-nos en os laurels” porque os laurels encara son muito lueñes.

Tampoco no emos d’esmobilizar-nos en l’ambito sozial y laboral. O rezién anunzio de tancar a impresa Moulinex de Balbastro con a perda de 271 emplegos ha estau analizau por Juán Bandrés, Consellero d’Economía d’o Gubierno d’Aragón, como “un caso de deslocalizazión de libro” debiu á os altos costos d’a man d’obra aragonesa.
Pero garra chen s’esplica por qué no se produz este mesmo prozeso deslocalizador en a fabrica que Moulinex tiene en Urnieta (País Basco). A deslocalizazión ye un d’os fenomenos que se dá en os prozesos de globalizazión economica, pero no pende d’un “maldau biblico” que no en podemos eslampar y que surte á l’azar.

A fabrica que Moulinex tiene en Urnieta ye fuertemén subenzionada y se’n benefizian toz os ziudadans., importando igual o suyo parixer ideolochico. Pero estos diners no salen d’a no cosa, sino d’as abentallas economicas y fiscals que tiene esta comunidat, que surten d’un contesto d’esfensa d’o propio, ye o contesto economico creyau por o nazionalismo qui empacha que se faigan deslocalizazions, atamás de que o costo d’a suya man d’obra ye mayor que no l’aragonés y empenta localizazions en territorio basco.
Por ixo organizazions como S.O.A (Sindicato Obrero Aragonés) no nos amugamos á bellas demandas puntuals. No creyemos en a causalidat dreita., sino que luitamos por a creyazión d’un contesto de relazions laborals aragonesas que dixe que os aragoneses seigamos más soberanos en a chestión d’os nuestros recursos.

A creyazión d’este contesto aragonés más soberano en lo economico y laboral ha d’estar sinzero. A reibindicazión material d’una millor calidat de bida be d’estar complementada con a esfensa d’a identidat cultural aragonesa. Os dos son elementos complementarios ta una millor calidat de bida que bi incluye elementos materials y intanchibles. En esto nos esferenziamos d’atros sendicatos que se miran d’aragonesizar a suya estrolicadera, que no ye sinzera, ya que se troban plantaus en a definizión cultural que d’Aragón fizo lo zentralismo y que ba d’a man con o proyecto economico que ellos tienen t’Aragón.

Dende lo S.O.A (Sindicato Obrero Aragonés) luitamos por a creyazión d’un contesto global aragonés que permita la chestión d’o propio y que faiga que os “maldaus biblicos” cheneraus por o capitalismo global en seigan menos. Por ixo y como en toz os nuestros años d’esistenzia dizimos con rasmia que CAL CONTINAR LUITANDO.

Por o primer de Mayo!!
Por os treballadors!!
Por a nuestra identidat!!
ENTALTO A LUITA OBRERA ARAGONESA!!!

Puedes dejar una respuesta, o un trackback desde tu sitio.

Dixa un comentario