Tal día farà un any

Domingo, septiembre 1, 2013 10:07
Publicau en a categoría prexinando, purnas

O reloch d'Ascaso (Sobrarbe)

O reloch d’Ascaso (Sobrarbe)

Iste ye o reloch de sol d’Ascaso. Pintau sobre a paret d’una casa d’un d’ixos lugarons d’Aragón an que nomás que i vive chent ta l’estiu. Ditz a canta d’a Ronda de Boltanya que iste reloch marca o tiempo en que a chent marchó. Como tantos atros aragoneses yo he habiu de marchar d’o país. Y bien marchau que soi. Agora chusto, hue, fa un anyo que dentraba en a que agora ye casa mía y asperaba o camión d’a mudanza que veniba dende Zaragoza.

Marchar-ne estió una decisión meditada dende feba tiempos, pero que no remataba de fer. Marchar-ne nunca no ye fácil, y de vegadas se fa quan sientes que t’empentan u mesmo que t’arrocegan. Muitas cosas que m’aimo m’asperaban en Barcelona, pero tamién en deixaba atras dezaga. Agora que fa un anyo puedo dicir que estió una buena decisión. No tot ha estau vins y rosas, ye platero, pero no puedo deixar de pensar que iste ha estau un buen anyo por muitas razons.

O mío corazón, a mía capeza, viven dislocaus dentre lo que soi, siento, pienso y m’aimo, y lo que soi, sentiré, pensaré y m’aimaré en o futuro. He aprendiu a redefinir una parti d’a mía traza de vivir. He aprendiu a fer servir trastes que antes me miraba con medrana. He aprendiu a confiar más en as mías capacidatz. He re-aprendiu que no tot ye como queremos que siga. He tornau a sentir a necesidat de luitar por o que pienso y creigo. He aprendiu a soniar sobre o futuro d’o país en que vivo, sin deixar de soniar d’o futuro d’o país que ye mío. Pero sobre tot, en iste anyo he aprendiu a reconoixer os que agora son os quatro pilars que alacetan a Jorge Romance.

O banco de Jesús en Abiego

O banco de Jesús en Abiego

Una parti d’ixos pilars, que no totz, os aprendié, os sentié y os adapté en muitas nueitz en iste banco d’o costau. Ye o banco que bi’n heba debant de Casa Jesús en Abiego. Agora nomás que quedan ixos repuis de metal. En ixe banco, en ixe bar, con a chent que me redolaba allora, con Jesús l’amo d’o bar, reaprendié cosas que pai y mai ya m’heban amostrau, y que agora han retornau ta quedar-se en forma de pilars d’a  vida. Pero o tiempo fa que tot cambee, tamién, y agora ni o banco ye, ni Pedro, o cartero amigo de Jesús ye, ni Jesús ye en o bar. Agora ya no se siente a “os de Sant Joaquín” por a carrera, ni Jesús mos asperará con as medianas a meyo ubrir, ni con o porrón plen.

No miento si digo que muitismas nueitz en ixos bancos, amás de charrar de tantismas cosas, soniabamos con un mundo de ak-47, y agora, mira-te-lo bien, en Casa Jesús d’Abiego, en tienen.

Ak-47 en Casa Jesús

Ak-47 en Casa Jesús

Asinas son de vegadas as cosas. Igual que yo me’n soi tornau ta Barcelona, agora os kalashnikovs con que arreguibamos y febamos mofla, son penchaus d’as paretz d’o bar que una vegada estió quasi casa nuestra. Dende o mio piso en l’Eixample de Barcelona me remero con un sonriso as conversas con Jesús, igual que me remero d’os sonrisos d’o mio pai, as gambadas con o mio yayo por as carreras de Zaragoza, me veigo os uellos d’a mai con glarimetas quan fa un anyo meteba a Sputnik en l’auto y veniba baixo a plevia enta aquí. Me veigo os uellos que he aimau y os uellos que encara m’aimo. Tot ixo ha feito de mi qui soi y qui quiero ser. Tot ixo y muitas atras cosas de buenas y de no guaire buenas que en o recorriu d’a vida han deixau una remeranza que fa que m’emocione. Tot ixo apuntala iste anyo en Barcelona. Tot ixo apuntala os quatro pilars d’a mía vida dende os quals, enreligando-se y puyando-se y cruzando-se uns con atros configuran o mapa d’os mios deseyos, trazas de ser, ideyas, seguridatz y medranas.

Sin perder lo que era me hizo barcelonés

As remors d’o diya 17 de chunio

Lunes, junio 17, 2013 11:32
Publicau en a categoría prexinando, purnas

Aquí prencipió el camín d'a resta d'a vida

Aquí prencipió el camín d’a resta d’a vida

En zagueras nomás que escribo en istas purnas por tradición. Escribo en os diyas que o calendario me fa especials. A yo, a la mia chent, a o país, a os países que m’aimo. O 17 de chunio ye un d’ixos diyas especials. Dende fa ya 14 anyos que en iste diya a mía piel se fa más fina. Dende fa ya 14 anyos que l’esprito se me fa más tobet un diya como hue. Que bella remor me recorre l’espinais, os uellos, a piel, as mans, o cuerpo.

Antis yera un diya triste, porque remeraba, más que tot, tot o que no vivié con tú. Agora tamién tien ixe componente una mica triste, una tristura d’ixas fundas que no deixa dolor que ye melancolía. Cada anyo a sensación cambea. He teniu anyos en que una foto me remeraba a tu. Atros, en que remeraba totas as cosas que una vegada m’amostrés. As pinturas que una vegada faciés de ninón tamién m’encorreban atros anyos dende os tuyos lugars. A pasión nuestra por as parolas tamién me deixó charrar de tú. Y también as tuyas mazadas me feban más facil charrar de tú, d’o tuyo paso por a vida.

Bi’n ha, ixo sí, muitas cosas y mesmo personas en común en totz ixos posts. Os posts que charran de Jorge Joaquín Romance Serrano o pai que me deixó tantas cosas ta que siga l’hombre que soi. O pai con qui no he puesto compartir muitas d’as cosas buenas y dolentas que m’han pasau dende ixe 1999. He cambeau de ciudat tres o quatre vegadas, de bellas amistatz, y d’atras no, he siu feliz y no tanto, pero a la fin, en iste cabo d’o camín en que soi agora, soi triballando d’o que me fa goi, en una ciudat que m’aimo y en a que tú podebas haber viviu y no queriés y con chent que m’aima y a la que m’aimo.

De vegadas trobo a faltar quan si que creyeba que bi’n heba atra vida dillá d’ista, porque allora sí que podría dicir que yes veyendo l’hombre que soi y tot ixo que foi y me feria goi pensar que os tuyos uellos s’iluminarían una mica, con una mica d’argüello por haber feito os camins que he feito. En realidat, me fa rabia pensar que te marchés y deixés a la mai sola, como yo he feito, encara que no estase a tuya culpa. Os dos sotz responsables de que yo siga como soi, con os mios puntos buenos y febles, que en tiengo, y muitos. Agora a mai ye a 300 kilometros, pero ye de dar que la siento más amanada que no pas a  tú, que yes nomás en o remero, en as memorias, en os sentimientos, en as ganas d’explicar-te tot o que soi escribindo agora, que fa 14 anyos que a tuya man deixó d’apretar a mía y a d’a mai de matinada. Te marchés sin dicir cosa, porque feba diyas que no dicibas cosa, pero te marchés, aspero que sí, sentindo tot o que a mai, os tios y yo te querebamos dicir, entre atras cosas, que t’aimabamos, y que mos faciés una vida millor a totz os que te chuntamos por o camín. Hue puedo dicir ixo, pero me fa duelo tamién que en 1999 feba muitismos anyos que no te decié que te m’aimaba, y agora que lo digo, publicament, no yes aquí ta sentir-lo.

Ecos d’o LAPAO y o LAPAPYP

Lunes, mayo 20, 2013 10:23
Publicau en a categoría de l'aragonés, purnas

No he escrito cosa en o blog sobre a nueva lei de no-luengas que han perpetrau os partius antiaragoneses que gubiernan o país. Si que he escrito en atros puestos an que m’han demandau a mia opinión.  Amás, con a suerte de poder fer-lo en as tres luengas d’o país, en as tres luengas que m’aimo. Asinas que tos remito a ixos articlos y entrevistas ta leyer a mía opinión sobre una lei d’a que s’han feito mofla muitisma chent por o tema d’as denominacions, o LAPAO y LAPAPYP, pero que baixo a napa d’o nombre, amaga l’asesinato premeditau de l’aragonés y o catalán, quitándolos d’as escuelas, d’os toponimos, d’a normativización, d’a normalidat.

En primeras, en Público, en castellano.

Una ley que aprobará el gobierno de Aragón y que niega a los aragonesohablantes y a los catalanohablantes, aragoneses igual que los castellanohablantes, sus derechos, todos, incluso el derecho de que su lengua sea nombrada por el nombre que tiene y no por el capricho de los políticos que se pasan por el forro a la comunidad científica.

Tamién en Vilaweb, an me deixoron fer versión en aragonés y en catalán.

Son chenocidas culturals, u preban de ser-lo, pero ye a-saber-lo d’important que por o suyo bien y por o nuestro, no lis deixemos ser-lo, fablando, creyando, vivindo y comunicando en ista polida luenga que os aragonesos hemos trayiu t’o mundo y que tien parolas tan achustadas ta definir a qui aprebará a lei de no-luengas como carnuz, ababol u borde.

Però els aragonesos, els aragonesos que parlem l’aragonès (i els qui parlen català, també), hem fet sobreviure la llengua sense lleis. Hem fet diaris, vídeos, revistes i còmics, hem après la llengua i l’hem ensenyada en associacions, escoles… Fins i tot hem creat tres grafies diferents, però això és un altre tema.  L’aragonès sobreviurà encara que els antiaragonesos que ens governen l’intentin matar. Com fins ara.

Tamién me facioron una entrevista en Nació Digital, compartindo espacio con Francho Nagore.

De la mateixa opinió és Jorge Romance, editor del diari digital en aragonès Arredol, que considera “ridícul i vergonyant” l’acrònim i apunta que no és pot parlar de “reforma de la llei, perquè el text el que fa és esborrar una llei de mínims”.

En zagueras, tenié a suerte de poder pasar tot un día en Fraga charrando sobre o tema con a chent d’a ciudat. Asinas lo veyié yo ta la Sexta.

Aragón yes tú

Martes, abril 23, 2013 12:27
Publicau en a categoría purnas

wpid-2012-09-11-10.38.56.jpgEstendillo a mermelada de moras por o pan mientres remero que l’anyo pasau feba o primer trango d’o camín que m’ha trayiu enta aquí. Foi dos fiestas en una. A d’aquí, plena de libros y flors, y la d’allí, a fiesta d’una nación que s’amorta a si mesma feita confusión.

Aragón se regala como o chelo de l’hivierno, desfendo china chana un camín de mas de mil anyos. Pero ixo no  ye desincusa. Encara remane qui planta cara a lo cierzo u se deixa aventar por ell. Porque no sabemos si somos dragons u caballers, pero somos. Con fuego u con lanza hemos de fer un poder por continar fendo, por continar estando, por continar un camín que prencipió fa tantos anyos.

Os lugars comuns dicen que somos polvo, nieve, aire y sol. As cantas mos dicen que somos un pueblo d’augua en un pais ixuto. Duros y ternes. Nobles y brutos. Que somos o cierzo, tamién. Pero iste país que se mos eslampa d’as mans ye muito mas que ixo. Os suyos paisanos somos muito más que tot ixo. Aragón son istas mans, istos uellos, istos uembros. Istos didos que escriben isto, y os uellos que lo leyen. Aragón yes tú. Y Aragón continará siendo siempre que tu i sigas.

Un pueblo que fa camín por endreceras que diverchen. Uns enta l’autodestrucción. Atros, enta un futuro d’asperanza, libertat y solidaritat. Yo tiengo platero o camín que foi, en presonal y en colectivo. Si nusatros queremos que o país perviva no ye prou con a nostalchia d’un diya asinas dende l’exilio. Cal que ixa nostalchia, d’o pasau que estiemos y d’o futuro que estaremos, esdevienga rabia, luita y trangos enta o camín. O mesmo camín que mos deixoron os pais, y os pais d’os pais, y asinas dica mil y pico anyos dezaga. O mesmo camín que hemos de recorrer ta construyir o país que queremos. Aragón son os tuyos pietz que caminan enta l’asperanza.

ENTALTO ARAGÓN LIBRE!!!!

As preferents, u como abusar d’a confianza

Lunes, febrero 25, 2013 12:33
Publicau en a categoría purnas

Inmaculada debant d'a Caixa Laietana en Mataró

Inmaculada debant d’a Caixa Laietana en Mataró

Ista sinyora ye Inmaculada. Vive en Mataró, y ye una d’as afectadas por o timo d’as preferents con que bellas entidatz bancarias (Bankia en iste caso, propietaria de Caixa Laietana) han abusau d’a confianza de muitisma chent.

L’atro diya estiemos grabando en Mataró una protesta d’ista chent que han visto como la caixa a qui heban confiau totz os estalbios d’a suya vida. Veyendo o perfil d’a chent que i protestaba se veyiba que yera chent de edat ta qui o sinyor d’o banco yera como un fillo adoptau. En muitos lugars y vicos o “banquero” ye quasi un familiar más, un en qui se deixa a confianza, os secretos economicos, mesmo os familiars, y que en l’universo mental de muita chent ye como lo mosén. Y puestar que antis si que estase asinas, pero agora no.

Protesta en Mataró contra las preferents

Protesta en Mataró contra las preferents

As caixas y bancos, con isto d’as preferents, ha preferiu abusar d’ista confianza, de chent que yera emplida d’ella, y sobre tot, de chent con pocos recursos (culturals y economicos) ta esfender-se. De feito, muita d’a chent que s’arroclaba debant d’a oficina d’a Caixa Laietana mos deciba que heban deixau os estalbios de tota una vida en mans d’o “banquero”. Y fa que pensar que os estalbios de tota una vida que mos deciban estasen en muitos casos no nomás de 50.000 euros. Tota una vida triballando ta estalbiar 50.000 euros y ta que te furten ixos mesmos diners por abusar d’a tuya confianza. No son grans inversors. No han quiesto chugar a la Borsa. No han quiesto aproveitar-se d’o sistema ta especular. Simplament, heban confiau o triballo de tota la vida a qui pensaban que no lis podeba fer burro falso.

Por ixo, no ye estranio que Inmaculada, que heba invertiu os diners que recibió por l’accident d’o suyo mariu, ya muerto, lis adedicase, sin importar cosa que a mia camara estase debant d’ella, istas parolas que tos transcribo tarcual mos las dició.

Me han pescado 64000 euros. Firmes o no firmes estáis copados…y ¿por qué? Si esto me lo quedó mi marido por un accidente de tráfico, no lo he robado y ellos sí. Son ladrones, criminales, canallas, porque si no fueran criminales esto nos lo daban y son unos criminales, ¿qué han hecho? Ladrones, canallas, macarras, cornudos, hijos de una puta, no tienen padres conocidos, si tuvieran padres conocidos, estarían honrados y ellos no la tienen.

Con a suya capeza, as nuestras libertatz

Jueves, diciembre 20, 2012 10:24
Publicau en a categoría purnas


En 1591 un exercito castellan plegaba en Aragon, se enfrontinaba en Epila a una banda achuntata por bells nobles aragoneses y dentraba en Zaragoza sin garra oposición. Asinas remataba un d’os episodios mas tristes d’a nuestra historia. Por esfender a un convicto, Antonio Perez, Aragon facio una crida a os suyos dreitos y institucions. Pero no tenio a fuerza ta esfender-los.

Con a capeza de Juan de Lanuza, “O mozo”, cayeban a tierra buena parti d’os fueros d’o pais, retallaus en Tarazona a l’anyo siguient por Felipe I d’Aragon, II de Castiella. Con a suya capeza rodaban tamien os tiempos en os que Aragon sabeba esfender os suyos fueros y o suyo pasau y present. Con as capezas talladas y amostradas mientres meses d’os nobles rebeldes s’amostraba tamién una parti d’a fin d’o país.

Un historiador frances esplanicaba en o sieglo XIX: “Os aragoneses, yeran y son, un pueblo que guarda o suyo pasau y a suya historia, y curoso con as suyas libertatz y chusticias, pero en ixe tiempo, encara que argüellosos d’a suya libertat ganada, no sabioron esfender-la

En Zaragoza, mientres os soldaus castellans feban guardia en o cadalso, os ciudadans s’amagaban en as casas suyas. Nomás que a boira estió testimonio de l’astral que li tallo a capeza a o Chusticia. Huei, 421 anyos dimpues, se remera a figura d’o Chusticia. A suya estatua preside una centrica plaza de Zaragoza, huei se levaran flors y banderas y os aragoneses han tornau a fer d’o Chusticia un simbolo y una institucion publica…o simbolismo de l’acto queda en ixo, y os huellos parixen querer veyer, encara, os cuerpos podrius d’os muertos que penchoron d’as murallas ta remerar a os aragoneses que no heba de debantar-se contra os forans y o rei.

Nos que somos tanto como vos, pero juntos más que vos, os hacemos principal entre los iguales, con tal que guardéis nuestros Fueros y libertades, y si no, no

Entalto Aragón Libre! Independencia!

15-D Inundemos a CHE

Miércoles, diciembre 12, 2012 9:44
Publicau en a categoría purnas

Con iste video con as parolas de muita bienquiesta chent d’Artieda y solidarios con o lugar mos claman a manifestar-nos o venient sabado 15 devant d’a CHE, principal culpable de l’expolio que ye sufrindo Artieda y d’as agresions policials d’o zaguer octubre. Artieda ye un lugar vivo que continará vivindo. Yesa no pas! Artieda no rebla!

 

Soniando en o mar

Martes, noviembre 20, 2012 14:48
Publicau en a categoría prexinando, purnas

A placha de Platja d'Aro, de maitins

A placha de Platja d’Aro, de maitins

Os humans d’interior mos miramos a mar una mica de bislai. Ixe horizont infinito mos enlucernia como nomás a infinitut d’as nuestras planas y disiertos fan.  Os nuestros disiertos y planas mos apegan a la tierra, y mos fan pensar en os quefers y triballos que mos quedan a fer ta creyar espacios nuevos y vitals. Pero la mar, “ai, la mar”, mos enlucernia d’atra traza. Mos fa soniar en futuros y  pasaus, mos desapega d’o present y mos carria con o suyo ritmo enta os nuestros prexins.

Yo soi un hombre d’interior. D’interior d’un país que ye interior. D’interior d’una ment que ye interior. Y debant d’a mar, y digo a mar porque m’agana, os mios uellos se fan luminetas, como os d’os ninos quan lis fan un present ta reis. Me’n deixo levar por as olas y me veigo volando por baixo l’augua. Ye un esconxuro que me  fa vuedar os pensamientos negros y m’imple de mundos posibles. No fa guaire soniaba con una placha asinas, y encara que no ye a mesma placha, y encara que en ista placha de Platja d’Aro yera yo solenco, no podié evitar pensar en as sensacions que me deixan bells suenios.

Ayer me miraba de fito en fito un punto cualsiquier en ixa mar que me redolaba. Deixé dezaga a unidat movil con que hebanos de ninviar as imachens d’un crimen, deixé a os companyers difuera d’a mia anviesta, y me capucé en a mar con a fuerza d’os suenios. En os tiempos d’antis mas esnavesar a mar yera aventura, y si hue somos aquí ye porque bells homo sapiens sapiens tenioron a fuerza y a valura de chitarse a navegar con barcas de fusta mal atrapaziadas.

Dimpués d’a mar dicen que bi’n ha tierra an que aterrizar-se.

Casamuda y paismuda

Domingo, noviembre 18, 2012 11:53
Publicau en a categoría prexinando, purnas

O balcón de casa mía

O balcón de casa mía

A primer vegada que venié ta Barcelona sabendo qué feba estió en 1996 u 1997, no lo remero guaire. Venibamos os pais y yo en o 127 familiar que adugaba la mai. L’auto se quedó aturau en plegando a lo peache que i heba en El Vendrell. L’auto se quedó en un taller d’allá y nusatros veniemos enta Barcelona en un taxi Mercedes que mos deixó en l’Eixample, en a carrera Calabria con Gran Vía an que i heba l’hotel, muit amán d’o puesto an que agora vivimos Sputnik y yo. D’ixos diyas remero que a ciudat m’enlucernió. Coincidiba que yera La Mercé, y que indo solenco a bell concierto una colla de chent m’acullió ta salir de borina con ells. Tamién conoxié un bar que se deciba “Los de Aragón” y que risultó ser un bar gay.

Continé tornando-ie dende ixe primer viache, porque ya Barcelona m’heba empliu una parti d’a mia vida. Con o pasar d’o tiempo torné ya ta quedar-me, con totz os mios libros en a pocha, y a vida me levó unatra vegada ta Zaragoza en 2006. En os seis anyos que he pasau en Zaragoza, y por muitas razons, siempre he teniu una parti d’a mia cabeza a l’atra banda d’o disierto. 6 anyos vivindo en Zaragoza con parti de l’esmo en Barcelona. Y a la fin, fa tres meses, se dio la oportunidat de tornar-ie. Y aquí soi. Con ixe balcón de dos banderas que son a mesma bandera con as estrelas en puestos diferents.

Aquí vivimos agora Sputnik y yo. En un piso en que ya heba estau y an cal puyar 7 pisos d’escalas. Amán d’o puesto an que estié dormindo a primer vegada que estié en Barcelona. Un piso en que tres meses dimpués ya conoixco an son os interruptors d’a luz quan i soi a escuras. En un vico una mica especial pero an que en o bar de baixo casa ya saben qué café quiero fer de maitins y que biera de nueitz. Amán d’una estación de metro que ya conoixeba y que marca o prencipie d’a chornada laboral. Amán, tamién d’a parada d’un bus que tamién teneba amán en Zaragoza, a d’o 20, que en Zaragoza no agafé nunca y que en Barcelona he agafau menos d’o que habría d’haber feito y que m’aganaría d’agafar muito más.

Prou que no ye a mesma Barcelona que deixé quan marché en 2006, igual que yo no soi o mesmo de fa 6 anyos. Prou que encara soi fendo os trangos que amenisto ta tornar a sentir-me parti d’ista ciudat que me agafó por l’esmo ya fa tantos anyos. Prou que agora, con mas desperiencia, pero tamién con mas inseguridatz laborals, o ritmo d’a mia vida barcelonesa ha cambeau. Prou que, agora que vivo en Barcelona, tamién trobo a faltar muitas cosas de Zaragoza. Pero a vida ye un camin que no s’atura y que tien fitos que mos marcan ta cutio. Imos cambeando con o tiempo, pero i ha cosas que siempre remanen, siempre mos quedan, siempre mos remeran y remeramos. Puestar que o mio destín siga ser barcelonés en Zaragoza y zaragozano en Barcelona.

Puestar porque, como una vegada me esplanicó a mia mai, fa muitos anyos ufrioron un triballo a o pai en Barcelona, antis de que yo naixese. Ells no se decidioron a fer casamuda. Yo hese naixiu barcelonés, y puestar, por ixo, qui ha tornau a fer casamuda enta aquí he estau yo, ya naixiu, creixiu, y feito un hombre adulto. Y puestar por ixo que d’un tiempo dica agora suenio asobén con o pai. No con a suya muerte, ni con o feito que ya no i siga, sino con esplanicar-li as cosas que me pasan, fer gambadas con ell y con atros suenios, alufrar o mar pensando a vida y sentindo que cumplo o prochecto de vida que ell no fació.

“También los trabajadores tenemos responsabilidad de lo que está pasando, porque no hemos actuado a tiempo”

Viernes, noviembre 16, 2012 17:51
Publicau en a categoría purnas

Laurentino, en vada de fambre por un companyer

Laurentino, en vada de fambre por un companyer

Iste hombre que ye con o dito puyau ye Laurentino. De conchunta con atros companyers de Telefonica ye fendo una vada de fambre ta aconseguir que readmitan a Marcos, a qui han forachitau d’o triballo. L’atro diya, o 14N estié grabando una entrevista con ista chent que ha decidiu fer un acto arriscau ta salvar o puesto de triballo d’un companyer. Grabemos allora a Laurentino unas declaracions sobre o sentiu que teneba fer ista aicción y atras muitas cosas. No tos puedo meter o video, en que se i veye a sinceridat d’as parolas de Laurentino. Tanto me plegó o que diciba, que en un acto igual no guaire profesional, en que remató deixé a camara en o sulero y li facié un abrazo. Tos copio, tarcual as sentié, as parolas de Laurentino ta que veigatz porqué a dignidat ye una d’as cosas más importants d’ista vida.

Hay que pararles los pies a esta casta de corruptos que nos gobiernan por arriba, en empresas, en bancos y en gobiernos y defender a la clase más humilde de este país, que a unos los están echando, a millones, de los trabajos, a centenares de miles de sus viviendas. Y una sociedad que abandona a los más débiles, a los miembros más débiles de esa sociedad, va camino del fascismo. Y nosotros decimos que la lucha no sólo es por Marcos, la lucha es para denunciar todo lo que está pasando e intentar que vosotros, los más jóvenes, tengáis una vida más digna porque sentimos vergüenza de la vida que os estamos entregando. También nosotros, los trabajadores, tenemos responsabilidad de lo que está pasando. Porque no hemos actuado a tiempo, porque no nos hemos enfrentado a tiempo, pero yo digo, aún estamos a tiempo de enfrentarnos. Pero yo me siento responsable también de lo que os estoy entregando, porque yo recibí un puesto digno de trabajo no porque lo conquistara yo, porque los anteriores me lo dieron. Y yo tengo el deber de daros a vosotros lo mismo que he recibido, a ser posible mejorado. Y eso es lo que hoy no estamos haciendo, por tanto no estamos a la altura, la clase obrera, de lo que está pasando”

Pachina 1 de 21612345...101520...Zaguera »