Yo nunca no he estau masiau partidario d’os dominios cheograficos. Si repleco o rete como un espazio global, ir reproduzindo fronteras estatals o nazionals no parixe un buen camín. Sin dembargo, cal rendir-se a la ebidenzia que toz os gobiernos y instituzions han feito d’os dominios d’internet un d’os suyos caballs de batalla.

Antiparti son os que s’han dau en dizir dominios culturals. O .cat, por exemplo, esiste no pas por una dezisión politica, sino por que a dezisión se prenió en l’Icann tenindo en cuenta o dominio cultural y lingüitico catalán, por o que mesmo instituzions no catalanas stricto sensu, emplegan o .cat.

En Aragón, por l’inte, as instituzions aragonesas han feito serbir asobén os dominios más abituals d’internet, como o .com, pero fa un tiempo que dende o Gobierno d’Aragón se dezidió impulsar l’emplego d’o .es. Ye una dezisión que se puede interpretar de muitas maneras, pero que tamién tiene un sentiu politico.  Pero o que yo quiero (y no estaré o primer, porque ya en han abiu atras propuestas similars) ye apostar por un sentiu estratechico.

Por a creyazión d’un dominio .ara

Impulsar un dominio propio “cultural” como .ara tiene abantallas (y bella desabantalla, pero ixas tos las dixo descubrir a busatros).

1. Por una banda premite a esferenziazión d’os dominios aragoneses de toz os atros dominios autonomicos españols (fueras d’os catalans que ya tienen o .cat)
2. Tamién suposaria un zereño inzentibo ta la creyazión de pachinas web, creyando más conzenzia dichital y mesmo identitaria
3. Premitiría integrar as muestras lingüisticas barias que bi ha en Aragón baxo un mesmo batiaguas cultural, fueras d’as esferenzias de luenga.
4. La imachen d’Aragón como puntera en o mercau teunolochico seria apuntalada con l’adopzión d’un dominio propio.

Garra d’istas razons ye una razón politica, sino estratechica. Puestar que bi aiga chen que beiga dillá d’a estratechia, no digo que no, pero dentre un dominio .es y un dominio .ara, ya que emos apostau por no emplegar os dominios chenericos como .net o .com siempre ye más esferenziador y por tanto, más imachen de marca apostar por ixo que ye propio y no por ixas atras cosas que podemos compartir y que, por ixo, mos fan uno más d’a ramada.

Compártelo

Deziban l’atro diya que as galaxias no yeran espirals en orichen. Puestar que no, yo tampoco no soi astronomo, nomás caleba ixo. Dizen, de feito, que ixos conchuntos d’estrelas teneban formas rarizas en os tiempos d’antismás. Pero ye esclatero, y a bida asinas mos lo amuestra, o mundo ya ye una espiral cutiana.

Fa años que triballaba en o Faro de Cartagena, dimpués Casa del Libro, agora ya fa 4 (y pico) que treballo ta Mediapro en Aragón Tv. Y siempre bi ha ziclos que se repiten, y parixe que agora ye un d’ixos ziclos. An lebará isto? Nomás o tiempo lo dirá, pero as sensazions, os prexins, l’esmo y pensamientos que me prebocan os diyas de güé ye parellana a aquels tiempos. Pero yo agora no tiengo 26 nián 30 años.

Eraclito, ixe profeta.

ποταμοις τοις αυτοις εμβαινομεν τε και ουκ εμβαινομεν, ειμεν τε και ουκ ειμεν τε

Compártelo

Agora que o proyeuto d’as Olimpiadas ya imple a boca de toz os de siempre, agora que amás, son prenzipiando a enrestida ta contrimostrar que sera sostenible, bueno, poliu, barato y que mos ferá más ricos, más polius y más millors, cal remerar como ba ixo d’o desembolique en Aragón. Cal remerar proyeutos como Gran Scala, cal remerar os resultaus d’a Expo de Zaragoza, d’o dragau d’o rio, d’as nuebas obras en Formigal, o Sarllé, d’a presentazión a escuras y por sospresa d’as obras en Castanesa. Asinas se fa o desembolique en iste país. Asinas se implen as pochas construyindo, dragando, chitando a tierra. Dende Montanyana en a Ribagorza, me nimbian iste testo. Montanyana ye atro d’ixos proyeutos sostenibles d’o gobierno nuestro. Isto dizen os suyos bezins:

Malas noticias para Montañana. Sale publicado en el BOA con fecha de ayer (2 de febrero), que toman con carácter urgente seguir con el proyecto 419-HU, expropiando todas las propiedades citadas en el BOA en agosto de 2009. Las escuelas van al suelo en un mes si no hacemos nada.
Si alguien sabe alguna manera o forma de poder frenar esto, agradeceríamos todo el pueblo, que nos ayuden.
No solo es nuestro centro social, donde hacemos exposiciones como lo es la elaboración del producto típico de la zona (coqueta), reuniones de asociación, sino que han sido las escuelas de mucha gente del pueblo y tiene mucho valor sentimental para nosotros.
Agradeceríamos toda ayuda posible o asesoramiento.
Muchas gracias.

Fa dos meses dende o Gobierno d’Aragón se deziba que no se espaldarian as escuelas. Que cosas.

Compártelo

Güe mos amanixebamos con a muerte d’una d’ixas presonas d’as que se diz que estió un perbibién. Güé emos conoxiu que o 20 de chinero ha muerto Mariano Constante, que estió en a Bolsa de Bielsa, que estió en Mauthausen y que dimpués rezentó en os suyos libros as suyas remeranzas en os campos de exterminio.

En a suya boz, muita chen prenzipió a ser conszién d’ixos españols de naximién que estioron repudiaus por o gobierno faxista de Franco y que rematón acotolaus en os campos nazis. Con el, atros como Joan de Diego, José Alcubierre y tantos, tantos atros, que perbibión dillá d’os orrors de Mauthausen, Güsen, Auschwitz que tantas begadas mos han conbidau a continar luitando, a no dixar que una cosa asinas pase atra begada.

A yo me marcó o biache que fazié a Mauthausen fa tres años, ye a begada que más amán estié de replecar l’orror, a medrana, a muerte, que mil aragoneses y milentas d’atras presonas abión de pasar en ixos campos. No ye a primer begada que pego o bideo, pero ye o mio unico omenache que puedo fer a ixa chen.

Compártelo

Iste maitín se presentaba a web d’as carreteras de Aragón. En ixa pachina s’esbiella cada meya ora a situgazión d’as carreteras que penden d’o Gobierno d’Aragón.

A web ye una buena ideya que implementa o que ya fa tiempos que fa a web d’a DGT y muitas begadas, sobre tot en ibierno, ye important ta os usuarios saber como se troban as carreteras chicotas que emplegan ta plegar enta os lugars d’Aragón. En tot caso, ye una primer prebatina, parixe, porque atamás que tiene bella funzionalidat intresant, creigo, y ye una opinión presonal que li mancan bellas cosetas.

Cosas intresants

• S’esbiella á ormino, cada meya ora, y  ye de suposar que si pasa bella cosa grau s’esbiellará más rapedo
• Tien un podcast ta sentir l’estau d’as carreteras aragonesas (que aprobeitarán as radios, ye de dar)
• Tien un mapa de carreteras esbiellau y un mapa de puntos negros (o “pero” ye que son en PDF)
• Tien un canal de notizias sobre as carreteras aragonesas
• Tien informazión sobre a cantidat de chen que ha pasau por as carreteras aragonesas
• A informazión d’o portal ye de libre uso por toz os ziudadans

Cosas a millorar

• Cheolocalizazión d’as zonas afeutadas. No ye defizil integrar os puntos kilometricos con sistemas como Google Maps ta beyer en direuto as zonas afeutadas.
• Construyir mapas autibos (y no en PDF), mesmo planteyar integrazions con sistemas GPS
• Manca un RSS ta siguir as notizias d’as carreteras, y mesmo os inzidents que salen en pachina prenzipal (Ta isto, puestar con datos en XML ta integrar-los en atros sistemas)
• Integrazión d’as carreteras estatals que pasan por Aragón ta que o portal esdebienga un referent de totas as carreteras d’a Aragón
• Os datos de trafico son feitos en XLS (Excel), si se trigase atro sistema de publicazión sin codificar, se podrian fer cosas intresants con els.
• A ran diseño, me sobra tanta letra capital, bi ha atras formas de dizir as cosas sin fer serbir as mayusclas.
• No repleco tampoco l’intrés d’o Gobierno d’Aragón de emplegar siempre os dominios .es debán d’atros más chenerals y no cheograficos.

Creigo que bi ha camin ta fer con ista aina que puestar muit util ta toz os que adugamos por o país. A web l’han feito dende a interpresa Consultis, que dentre atros triballos, fazión o rediseño d’a web d’a Fundación del Medio Rural que agora ye o blog presonal d’a politica d’o PAR Anabel Lasheras, o meyo de comunicazión Goza Zaragoza u a web d’Aragón Alimentos, portal instituzional sobre alimentos aragoneses.

Compártelo

Güé l’Heraldo d’Aragón adedicaba o 50% d’o periodico a fer campaña a fabor d’as Olimpiadas d’ibierno en Zaragoza. Mesmo feban un present, una pulsereta ta amostrar o refirme a la candidatura. Tamién feban un repaso por bellas caras conoxitas, garra d’as cuals yera contra o proyeuto. Tamién o cabo de semana y atamás de que a Mesa d’as Montañas s’ha trencau por ello, Aragón Telebisión dezidié que o suyo informatibo fese campaña por o recreximién de Cerler por a Val de Castanesa.

O proyeuto se presentó a opinión publica o biernes, diya de fiesta en Zaragoza (pero no en a resta d’Aragón), atamás que qui presentó o proyeuto o fazió en Zaragoza. Iste trango entabán d’una d’as obras más creticadas fazió que a Plataforma d’as Montañas dixés a Mesa d’as Montañas, un organisme creyau ta debatir y que eba alcordau una moratoria sobre o proyeuto dica que se trobés un punto d’alcuerdo dentre as partis.

Ya ha prenzipiau a enrestida por as Olimpiadas d’Ibierno, con lemas como “O Pirineo ye más amán de Zaragoza que de Barzelona”, “Si se fa de manera sostenible sera bueno ta tot Aragón” u “Cal creyar empleyo”. Por exemplo, o Gobierno d’Aragón bosa güé un anunzio (primer gasto publico y os que bendrán) que diz “Bi ha muitos Pirineos, pero o millor ye en Zaragoza-Pirineos 2022″. Nomás bi ha un Pirineo y profés, no ye en Zaragoza. Nomás cal beyer o que estió a Expo 2008, os proyeutos de Formigal, Castanesa o Gran Scala ta pensar que istas Olimpiadas no seran un modelo, prezisamén, de desembolique sostenible. Nomás cal beyer qui ye dezaga para saber o que pasará. Dica ixe inte en que o COI trigue atra ziudat (si no lo fa antis o COE) ya podemos estar paraus ta que mos digan, una begada más, antiaragoneses, antitot y bellas cosas polidas más.

Astí somos.

Compártelo

Ye un d’ixos maitins polius de Zaragoza. A chen se mete a muda y sale ta la carrera a dixar-se bier, a lebar os crios a beyer os chigans bailando y a fer-se fotos con O Morico u O Forano. Ye o diya d’o patrón y a ziudat que tantas begadas se tranca en as suyas cantonadas y replazetas, sale a bibir y a respirar. As carreras esdebienen espazios ta conbibir, chugar, cantar, danzar, aimar y arreguir-se.

Ta yo tamién tienen remeros foscos. Suposo que no nomás ta yo. Mientres años A Seo yera un d’ixos espazios trancaus d’a ziudat. Antis d’a restaurazión yera un forau fosco que nomás s’ubriba ta San Balero. Remero ir, de chicorrón, d’a man d’a mia yaya dondiando por o zentro d’a ziudat, dica que remataba a misa en o Pilar. Allora yera l’inte d’amanar-se a fer un pochón a o patrón de Zaragoza. Remero o fosco que yera tot, remero a negrura d’una ilesia gran como A Seo, plena de güellos apagaus que se te miraban dende os pedestals. Allora t’amanaban un brazo tallau, tallau y labrau en plata, yera o brazo muerto d’un bispe muerto. Yo con sais, siete o güeito años eba d’amanar os labios y fer-li un pochón pleno de medrana y una mica de fastio. Yera l’unico inte fosco d’un diya á ormino soleyau y con zierzo zereño bufando dende a bal d’o rio. Dimpués te minchabas o roscón, redolau por a tuya chen, os tuyos yayos y pais y tios.

Agora o diya continua estando soleyau. Somos menos chen en a familia porque a bida con a foscor o con a claredat, contina entabán. Agora ya no boi a adorar o brazo de San Balero, pero contino minchando roscón, baixando a beyer os chigans, sentindo a mosica en as carreras y dixando que o zierzo, zereño o feble, me bufe en a cara con a rabia d’o tiempo que ha pasau y o tiempo que encara mos queda por bibir.

Compártelo

Y si a finestra mos endreza enta un barzal? Y si mirar con os güellos d’esdebenidero plens mos remata lebando ta un caramuello de fustas cruzatas? Y si cosas que pensamos y sentimos no se pueden dizir ta no ferir-mos a nusatros mesmos u a presonas que mos aimamos?

Y si cruzar a finestra enta un atro mundo no ye millor que remanir a iste costau d’a reyalidat?

Compártelo

Istos diyas soi beyendo capitol dezaga capitol de Fringe, como diz un amigo de yo, os “X-Files” d’o sieglo XXI. Tamién, por feitos que no bienen a lo caso, y sobre tot, sin mercar o libro, he prenzipiau a leyer “El símbolo perdido” de Dan Brown. Por atra parti, tamién beyé l’atro diya un reportache en a telebisión sobre inbestigazions en o terreno d’as posibilidaz d’a mente. Qué tien tot isto que beyer dentre si? Pues que en os tres puestos fablaban d’una espezie de conzenzia global, d’un gran chenerador de prexins, pensamientos y intelichenzia feito d’a propia enerchia d’o ser umán.

Toz somos enreligaus, bien a dizir iste pensamiento que podez leyer en webs como ista de Global Consciousness d’a unibersidat de Princeton, o una mica más dillá por as suyas implicazions seudorelichiosas en The Intention Experiment. Ye por ixo que no truca o ficazio o feito que a chen que mos mobemos en campos parellans, de begadas tiengamos as mesmas ideyas. Tos somos enreligaus.

Fa cuasi un año, en febrero de 2009, dende Aragoneame enzetamos o proyeuto Blogliticos, un adibidor de blogs de politicos en Aragón. Tenebamos esclatero que l’alazet d’o proyeuto yera a conbersazión, y por ixo, cuan charremos con Marina Nogué ta que pensase un logo, estiemos fablando de fer una boira de bocadillos de colors esferens. Marina, a la que trobamos tanto a faltar que no emos borrau ni borraremos os suyos contautos en as nuestras achendas, fazió un logo, mui domestico, mui rapedo que leba en o proyeuto dende o prenzipie. O logo mos salió de baldes, fueras d’un te que conbidemos a Marina.

Logo de Marina Nogué para Blogliticos

Istos diyas o Gobierno basco ha presentau un portal de “Open Government” que le’n dizen, o Gobierno ubierto. Se diz Irekia y ye alazetau en a conbersazión. Por ixo no ye d’estraniar que aigan teniu a mesma ideya que nusatros y o suyo logo s’alazeta en bocadillos de comics de colors esferens, posaus en forma d’arbol (de Gernika, se suposa).

O logo d'Irekia

No se esautamén o pre d’o diseño d’o logo, encara que a presentazión d’o proyeuto si que sabemos que costó 43.000 euros. Pero bueno, cal dizir que han enzertau si se trataba de fer un logo que charra-se d’a partizipazión y a conbersazión. A qué si?. Cosas d’a conzenzia global.

Compártelo

Güé de meyodías un motorista ha muerto en Zaragoza dimpués d’un azident. Seguntes os testimonios y os periodistas que s’han amanau a lo puesto an s’ha produziu, un auto (l’Audi d’a foto) ha empentau a moto, que ha rematau en o tramo de carrera que ba en l’atro sentiu. Por astí beniba un autobús urbán que ha pasau por denzima d’o pobre choben que adugaba la moto. Isto ye, a lo menos, o que dizen os que han bisto l’azident. Yo no puedo dar testimonio propio porque no bi yera, isto cal dizir-lo.

Oras dimpués (tres oras han tardau en sacar o cuerpo d’o muerto d’a carrera) ha plegau una nota esplanicando os feitos. Ye siñada por achenzias y totas dan a mesma bersión, porque a informazión l’han quitau d’o mesmo puesto, a moto ha esbarizau y ha pasau a o carril contrario, an ha estau atropellau por l’autobús.

Según informaron  fuentes del Cuerpo de Bomberos, el joven falleció en el acto al caerse de la moto que conducía y ser atropellado por un autobús que circulaba en el carril de sentido contrario.

Nomás Aragón Tb, que ha estau presén en o lugar, y Aragón Digital han dito en o suyo informatibo que a moto ha chocau con atro auto antis de pasar a l’atro costau d’a carrera.

Un motorista ha fallecido esta tarde en un accidente ocurrido sobre las 14.17 horas en la Avenida de Goya de Zaragoza. Al parecer, el motorista ha colisionado lateralmente con otro vehículo, lo que ha provocado la invasión de la moto del carril contrario y el atropello de su conductor.

Insisto que yo no se o que ha pasau, nomás o que m’han rezentau qui sí ha estau en o puesto d’os feitos, tampoco no se a culpa d’a moto, de l’auto y de l’autobús. Feito nomás bi ha un, y nomás ha pasau d’una forma, pero mos ne esplanican de formas esferens. Qué no pasará con atras cosas?

Esbiellau: Me esplican que no yera un autobús urbán y por ixo he sacau ixa parola. Tamién s’ha de dizir que l’Heraldo güé publica una cronica ampla, an i mete o numero d’a matricula de l’Audi, y reconoix a secuenzia d’os feitos: choque moto-auto, inbasión de l’atra parti d’a calzada, choque con o bus. A cronica ye siñada por Marta Garú, una d’as periodistas de suzesos importans d’a ziudat.

Compártelo